ရန်ကုန်မှ
လိုင်ဇာသို့ လမ်းလျှောက်ချီတက်နေကြသော ငြိမ်းချမ်းရေးအဖွဲ့အား
တောင်ငူရဲများက ဖမ်းဆီးမည်ဟု သတင်း များထွက်ပေါ်နေခြင်းနှင့်ပတ်သက်၍
အမှန်တကယ် ဖမ်းဆီးလျှင် အစိုးရအနေဖြင့် ငြိမ်းချမ်းရေးကို
လိုလားခြင်းမရှိကြောင်း
လမ်းလျှောက်ချီတက်လာနေသောငြိမ်းချမ်းရေးလိုလားသူများက ပြောဆိုလိုက်သည်။ အဆိုပါ ငြိမ်းချမ်းရေးအဖွဲ့ကို ဦးဆောင်သူ ဦးအောင်မြင့်က အဆိုပါဖမ်းဆီးမည်ဟုထွက်ပေါ်နေသည့် သတင်းနှင့်ပတ်သက် ၍ " ကျနော်တို့က တောင်ငူကိုရောက်ဖို့ သိပ်မကြာတော့ပါဘူး။ ညနေဆိုရောက်မယ်ထင်ပါတယ်။ ကျနော်တို့ ငြိမ်းချမ်းရေးလိုလားသူတွေကို တောင်ငူက မြို့သူမြို့သားတွေက မကြိုရဘူးလို့ ရဲတွေက တားမြစ်ထားတာကို သတင်းကြားထားပါတယ်။ ပြီးတော့ ကျနော်တို့ကို တောင်ငူရဲတွေက ဖမ်းမယ်လို့လဲကြားထားပါတယ်။ အစိုးရအနေနဲ့ဒီလိုမျိုးလုပ်တာဟာ အားလုံးကလိုလားတောင်းတနေတဲ့ ငြိမ်းချမ်းရေးကို မလိုချင်လို့ဖြစ်တယ်။ ဘာပဲဖြစ်ဖြစ် ကျနော်တို့ မှန်ထားတဲ့ ရည်မှန်းချက်ဖြစ်တဲ့ လိုင်ဇာမြို့ကို ရောက်အောင်သွားမှာပါ။ လမ်းခရီးမှာ ဘယ်လိုအခက်အခဲတွေပဲ တွေ့တွေ့၊ နိုင်ငံတော်အစိုးရပဲဖမ်းဖမ်း ကျနော်တို့က ငြိမ်းချမ်းစွာရင်ဆိုင်သွားမယ်။ ဖမ်းတယ်ဆိုရင်လည်း ဘာတစ်ခုမှ တုန့်ပြန်တာမရှိဘဲ အေးအေးဆေးဆေး အဖမ်းခံသွားပါမယ်။ အကြမ်းမဖက်ဘူး။ နောက်မဆုတ်ဘူး။ ခေါင်းမငုံ့ဘူး။ " ဟု ပြောသည်။
ထို့အပြင် လမ်းလျှောက်ချီတက်လာသော ငြိမ်းချမ်းရေးအဖွဲ့အား တောင်ငူမြို့မှ ကြိုဆို ဧည့်ခံကျွေးမွေး ပြုစုပေးမည့်အစီ အစဉ်များအားလည်း အာဏာပိုင်များမှ ပိတ်ပင်တားဆီးမှုများရှိနေကြောင်းလည်း သတင်းများ ထွက်ပေါ်လျှက်ရှိသည်။
အဆိုပါ လမ်းလျှောက်ချီတက်သောငြိမ်းချမ်းရေးအဖွဲ့မှာ ဇန္နဝါရီ ၂၁ ရက်နေ့တွင် ကချင်ပြည် လှိုင်ဇာသို့ချီတက်ရန် ရန်ကုန်မှစတင်ထွက်ခွာခဲ့ကြောင်းနှင့် လမ်းလျှောက်ချီတက်သည့်ခရီးစဉ်မှာ ယနေ့တွင် ၉ ရက်မြောက်ရှိပြီဖြစ်သည်။
Arakan Time
No comments:
Post a Comment