Lashkar-e-Taiba အကြမ်းဖက်အဖွဲ့ဝင်များအထူးသဖြင့် အကြမ်းဖက်အဖွဲ့အစည်းတိ ပစ်မှတ်ထားလာစော်ကတော့ခါ ကုန်ခရေနှစ်က ကျူးကျော်သူ ဘင်္ဂလီမူဆလင်တိနန့် ဒေသခံ ရခိုင်လူမျိုးတိကြားမှာ အဓိကရုဏ်းတိဖြိုက်ပွားခရေ မြန်မာပြည် အနောက်ဖက် ရခိုင်ဒေသဖြိုက်တေလို့ ဆောင်းပါးရှင်က ဆိုထားပါရေ။
ယင်းအကြမ်းဖက်အဖွဲ့စည်းတိထဲက အတက်ကြွဆုံးနန့် အထင်ရှားဆုံးအဖွဲ့ရေ Lashkar-e-Taiba လို့ ခေါ်ရေ ပါကစ္စတန်နိုင်ငံအခြီစိုက် အကြမ်းဖက်အဖွဲ့ ဖြိုက်ပါရေ။
ဒေနိန်ရာမှာ အလျဉ်းသင့်လို့ လက်ရှကာအီတိုင်ဘာ Lashkar-e-Taiba အဖွဲ့ အကြောင်းကို အကျဉ်းချုံး ဖော်ပြပါမေ။ လက်ရှကာအီတိုင်ဘာအဖွဲ့ကို ၁၉၉၀ ခုနှစ်က အာဖဂန်နစ္စတန်နိုင်ငံမှာ စတင်တည်ထောင်ခပါရေ။ ယင်းအဖွဲ့၏ အဓိကခေါင်းဆောင် ကတော့ခါ ဟာဖစ်မိုဟာမက်ဆာအစ် (Hafiz Muhammad Saeed) ဖြိုက်ပါရေ။ ဒေအဖွဲ့၏ အဓိက ရည်ရွယ်ချက်ကတော့ခါ အိန္ဒိယနန့် ပါကစ္စတန်နိုင်ငံကြားမှာ ဆယ်စုနှစ်ပေါင်းများစွာ ပဠိပက္ခဖြိုက်နိန်ရေ ဂျမူးနန့် ကက်ခ်ျမီးယားဒေသ (Jammu and Kashmir) ကို အိန္ဒိယ နိုင်ငံထဲက ခွဲထုတ်ပနာ ပါစ္စတန်နိုင်ငံနန့် ပေါင်းစည်းရေး၊ ပန်အစ္စလမ်မစ်ဝါဒနန့် ၀ါဟာဘီအစွန်းရောက်ဝါဒတိကို တောင်အာရှဒေသ တခုလုံးမှာ ပြန့်နှံအောင်လုပ်ဖို့ဆိုရေ မူရင်းရည်ရွယ်ချက် ဖြစ်ပါရေ။ ယင်းအတွက်နန့် ကက်ခ်ျမီးယားဒေသမှာ အိန္ဒိယအစိုးရ အာဏာပိုင်တိကို တိုက်ခိုက်ခြင်း အပါအ၀င် အိန္ဒိယနိုင်ငံအနှံအပြားမှာလည်း အကြမ်းဖက်တိုက်ခိုက်မှုတိကို အများအပြား လုပ်ဆောင်ခပါရေ။ နိင်ငံတကာက သူရို့ကို အာရုံပိုစိုက်လာစော်ကတော့ခါ ၂၀၀၁ ခုနှစ် ဒီဇင်ဘာလအတွင်းက အိန္ဒိယပါလီမန် အဆောက်အုံကို တိုက်ခိုက်မှုနန့် လူအမြောက်အများ သီကြီပျက်စီးခရေ ၂၀၀၈ ခုနှစ် မွန်ဘိုင်းမြို့ တိုက်ခိုက်မှုတိ ဖြိုက်ပါရေ။ သူရို့၏ အဓိကရန်သူကတော့ခါ အစ္စရေးနိုင်ငံနန့် အိန္ဒိယနိုင်ငံရို့ဖြစ်တေလို့ ဆိုပါရေ။ ၂၀၀၁ ခုနှစ် စက်တင်ဘာလ (၉) ရက်နိန့် တိုက်ခိုက်မှု အပြီးမှာ အဖွဲ့၏ သဘောတရားရေး ပြောင်းလဲလာပနာ ကက်ရ်ှမီးယားမှာ တိုက်ခိုက်မှုတိ ပြုလုပ်စော်ထက် အာဖဂန်နစ္စတန်မှာ ဟိရေ အမေရိကန်တိကို တိုက်ခိုက်ဖို့အတွက် ပိုလို့ အားသန်လာစော်ကို တွိလာရပါရေ။ အမေရိကန်နိုင်ငံကိုလည်း သူရို့၏ ရန်သူ၊ အစ္စလမ်ဘာသာ၏ ရန်သူအဖြစ် သတ်မှတ်ထားပါရေ။
ယင်းအဖွဲ့ အဓိကအခြီစိုက် လှုပ်ရှားနိန်ရေ နိုင်ငံတိကတော့ခါ အိန္ဒိယ၊ ပါကစ္စတန်၊ အာဖဂန်နစ္စတန်နန့် ဘင်္ဂလားဒေရှ့်နိုင်ငံရို့ ဖြိုက်ပါရေ။ ယကေလည်း အဂုအခါမှာ မြန်မာနိုင်ငံကိုပါ ပစ်မှတ်ထားလာရေ အဖွဲ့အစည်း ဖြိုက်ပါရေ။ အမေရိကန်အပါအ၀င် ကမ္ဘာ့နိုင်ငံ အသီးသီးက လက်ရှကာအီတိုင်ဘာအဖွဲ့ကို အကြမ်းဖက်အဖွဲ့တိ စာရင်းထဲမှာ ထည့်ထားပါရေ။
အိန္ဒိယအစိုးရ အဆင့်မြင့်အရာဟိတိက ထောက်လှမ်းရေး အချက်အလက်တိကို ကိုးကားပနာ ပြောဆိုရေနိန်ရာမှာ ရိုဟင်ဂျာလို့ ခေါ်ရေ ဘင်္ဂလီမူဆလင် အကြမ်းဖက်သမားတိကို ဆော်ဒီအာရေးဗီးယားနိုင်ငံက အဓိက ငွေကြေး ထောက်ပံပနာ ပါကစ္စတန်အခြီစိုက် အကြမ်းဖက်အဖွဲ့အစည်းတိက အကြမ်းဖက်သင်တန်းတိ ပီးနိန်ရေလို့ ဆိုပါရေ။ လက်နက်တိကိုတော့ခါ ထိုင်းနိုင်ငံက ဝယ်ယူရေလို့ ဆိုပါရေ။
အိန္ဒိယအစိုးရ အဆင့်မြင့်အရာဟိတယောက်က “ဒေ ရိုဟင်ဂျာလို့ ခေါ်ရေ ဘင်္ဂလီမူဆလင်တိရေ စီးပွားရေးအကြပ်အတည်း၊ လူမှုရေး အကြပ်အတည်းတိကို ဘန်းပြပနာ မူးယစ်ဆေးဝါး ကုန်ကူးခြင်း၊ လက်နက်မှောင်ခိုရောင်းဝယ်ခြင်းနန့် ယင်းသူရို့ နိန်ထိုင်ရေအရပ်ဒေသတိမှာ အကြမ်းဖက်သမားတိ ခိုအောင်းပြီးကေ အကြမ်းဖက် ဖောက်ခွဲရေးသင်တန်းတိ ပီးနိန်စော်တိ၊ အကြမ်းဖက်စခန်းတိ ဖွင့်လှစ်နိန်စော်တိရေ ဒေသအတွင်းမှာ တန်ပြန်အကြမ်းဖက်လုပ်ငန်းတိအတွက် စိန်ခ်ါမှုတိဖြိုက်လာနိုင်ပါရေ” လို့ ပြောပါရေ။
အိန္ဒိယအစိုးရ၏ အဓိက စိုးရိမ်မူကတော့ခါ ပါကစ္စတန်အကြမ်းဖက်အဖွဲ့အစည်းတိရေ မြန်မာနိုင်ငံနန့် ဘင်္ဂလားဒေရှ့်နိုင်ငံရို့မှာ အခြီစိုက်ပနာ လူသစ်စုဆောင်း၊ သင်တန်းတိ ပီးပြီးကေ ၄င်းရို့နိင်ငံ၏ အရှေ့မြောက်ပြည်နယ်တိမှာ ဟိရေ လူမျိုးစုတိအကြားမှာ အကြမ်းဖက် ပဋိပက္ခတိ ဖြိုက်လာအောင် သွီးထိုးဖန်တီးလာဖို့စော်နန့် အကြမ်းဖက်လုပ်ငန်းတိ လုပ်ကိုင်လာဖို့အတွက်ကြောင့် ဖြိုက်ပါရေ။ တဖက်မှာလည်း အိန္ဒိယနန့် ဘင်္ဂလားဒေရှ့်အစိုးရရို့ရေ ပါကစ္စတန်ထောက်လှမ်းရေအဖွဲ့ (ISI) နန့် အကြမ်းဖက်အဖွဲ့ လက်ရှကာအီတိုင်ဘာအဖွဲ့ရို့၏ လှုပ်ရှားမူတိကို အပြန်အလှန်သတင်းပီးမှုတိ ဟိကတ်ပါရေ။
အထူးသဖြင့် မြန်မာနိုင်ငံနန့် နယ်စပ်ချင်း ထိစပ်နိန်ရေ ကော့စ်ဘဇားကနိန် တက်ကနာဖ်အထိ စစ်တကောင်းတောင်တန်းဒေသမှာ Jaish-e-Mohammed (JeM) လို့ ခေါ်ရေ အဖွဲ့၏ လှုပ်ရှားမူတိ ရှိနိန်ရေလို့လည်း အိန္ဒိယအစိုးရအရာဟိရို့က ယုံကြည်ကတ်ပါရေ။
ကုန်ခရေနှစ်က ဒေသခံ ရခိုင်လူမျိုးတိနန့် တရားမဝင် ကျူးကျော်သူ ဘင်္ဂလီမူဆလင်တိကြားမှာ နှစ်ကျော့ပြန်အထိ ဖြိုက်ပွားခရေ အပြန်အလှန်တိုက်ခိုက်မူတိ အပြီးမှာ မြန်မာအစိုးရကို ဆန့်ကျင်တိုက်ခိုက်ရေနိန်ရာမှာ ထောက်ခံမူတိ ရလာအောင် ရည်ရွယ်ပနာ လက်ရှကာအဖွဲ့နန့် ယင်းအဖွဲ့၏ မိခင်အဖွဲ့အစည်းဖြိုက်တေ ဂျာမတ်အူဒါဝါ The Jammat-Ud-Dawwa (JUD) ရို့ ပူပေါင်းပြီးကေ မြန်မာနိင်ငံမူဆလင်ကာကွယ်ရေးဖိုရမ် (Difa-e-Musulman Arakan –Burma Conference) ဆိုရေ အဖွဲ့သစ်တခုကို ဖွဲ့စည်းခကတ်ပါရေ။
၂၀၁၂ ခုနှစ် သြဂုတ်လ (၁၀) ရက်နိန့်မှာ လက်ရှကာအီတိုင်ဘာ (LeT) အဖွဲ့က ပြောရေးဆိုခွင့်ဟိသူ နာဒင်းအာဝါရီ (Nadeem Awari) နန့် ဂျာမတ်အဖွဲ့က သတင်းထုတ်ပြန်ရေးအဖွဲ့ဝင်တယောက်ဖြိုက်တေ ရှာအစ်မာမွတ်ရာမတ်အူလာ (Shahid Mehmood Rehmatullah) ရို့ပါရေ လျှို့ဝှက်အဖွဲ့တခုကို ဖွဲ့စည်းခရေလို့ စာရေးသူက ဆိုပါရေ။ ယင်းအဖွဲ့၏ အဓိကရည်ရွယ်ချက်တော့ခါ ဘင်္ဂလားဒေရှ့်နန့် မြန်မာနိုင်ငံမှာ ဟိရေ မူဆလင်ဘာသာရေးအဖွဲ့အစည်းတိက ခေါင်းဆောင်တိကို ဆက်သွယ်ချိတ်ဆက်ပြီးကေ အကြမ်းဖက်လုပ်ငန်းတိ လုပ်ကိုင်ဖို့ ဖြိုက်ပါရေ။
အန္ဒိယအစိုးရအဆိုအရ မူဆလင်အကြမ်းဖက် ခေါင်းဆောင်တယောက်ဖြိုက်တေ ဟာဖစ်ဆာအစ် (Hafeez Saeed) အပါအ၀င် လက်ရှကာအီတိုင်ဘာခေါင်းဆောင်တိရေ မြန်မာနိုင်ငံကို အဓိက ပစ်မှတ်ထားပနာ အကြမ်းဖက်လုပ်ငန်းတိ လုပ်ကိုင်ဖို့နန့် လူသစ်စုဆောင်းရေးလုပ်ငန်းတိ လုပ်ကိုင်နိုင်ဖို့အတွက် ဆွေးနွေး နိန်ကတ်တေလို့ ဆိုပါရေ။
ယင်းလက်ရှကာအီတိုင်ဘာအဖွဲ့က ရခိုင်ပြည်မှာ ဟိရေ မူစလင်တိ ဒုက္ခရောက်ရခြင်းနန့် ပတ်သက်ပြီးကေ လက်ဟိ ဦးသိန်းစိန် အစိုးရမှာ အဓိက တာဝန်ဟိရေလို့ မကျေမနပ် အပြစ်တင်ကြောင်းလည်း သိရပါရေ။
၎င်းအိန္ဒိယအစိုးရ အဆင့်မြင့်အရာဟိက ဆက်ပြောရာမှာ “ ပါကစ္စတန်အခြီစိုက် လက်ရှကာအဖွဲ့နန့် တတူ တခြားအကြမ်းဖက်အဖွဲ့တိ ဖြိုက်တေ Harkak Ul Jihadi al Islami (Huji), JeM နန့် Jammat ul Mujahideen Bangladesh (JMB) ဆိုရေ မူဆလင်အကြမ်းဖက် အဖွဲ့အစည်းရို့ရေ မြန်မာနိုင်ငံထဲက ရခိုင်ဒေသကို လာရောက်ပြီးကေ ရိုဟင်ဂျာ သောင်းကျန်းသူအဖွဲ့အစည်း RSO နန့် ဆက်သွယ်ပနာ အကြမ်းဖက်လုပ်ငန်းတိ လုပ်ကိုင်ဖို့နန့် အိန္ဒိယ အရှေ့ဖက်ဒေသ နယ်စပ်တိမှာ အခြီစိုက်စခန်းတိ တည်ဆောက်ဖို့ အစီအစဉ်တိကို လုပ်ဆောင်နိန်ရေလို့ ဆိုပါရေ။
ယပြီးကေ အိန္ဒိယပြည်တွင်းထောက်လှမ်းရေးဌာနက ၀န်ကြီးချုပ် မန်မိုဟန်ဆင်း ဦးဆောင်ရေ အိန္ဒိယအစိုးရကို မကြာခင်က ပေါ်ပေါက်လာရေ ရိုဟင်ဂျာဘင်္ဂလီအကြမ်းဖက်အဖွဲ့ အသစ်တခုဖြိုက်တေ ဂျာမတ်အူအာရ်ကန် Jammaat uL Arakan (JuA) အကြောင်းကိုလည်း သတင်းပို့ပြီး ဖြိုက်တေလို့ ဆိုပါရေ။
နောက် အိန္ဒိယအရာရှိတယောက် က “ ကျွန်တော်ရို့ရရေ အချက်အလက်တိအရဆိုကေ JMB အဖွဲ့ရေ စစ်တကောင်းတောင်တန်းဒေသ ဘင်ဒရိုဘင် (ရခိုင်အခေါ် ရွာတော်) ခရိုင်အစွန်အဖျားဒေသတိမှာ စစ်သွီးကြွသင်တန်းတိ ပီးစော်တိမှာ ပါဝင်ပတ်သက်မူ ဟိပါရေ။ ဒေသူရို့ရေ မြန်မာနိုင်ငံထဲမှာ အကြမ်းဖက်လုပ်ငန်းတိ လုပ်ကိုင်ဖို့ အဓိကရည်ရွယ်ပါရေ” လို့ ဆိုပါရေ။
ရိုဟင်ဂျာ ဘင်္ဂလီတိ လှုပ်ရှားမှုတိမှာ ပါကစ္စတန်ထောက်လှမ်းရေဌာန (ISI) ၏ ပါဝင်ပါတ်သတ်မှုတိကို အဓိက ထုတ်ဖော်နိုင်ခစော်ကတော့ခါ ၂၀၁၂ ခုနှစ် စက်တင်ဘာလ ၁၁ ရက်နိန့်က ကော့ဘဇားခရိုင်အတွင်းက အီဂါဒ် (Idgah) မူဆလင်ဘာသာရေးကြောင်း တရားဟောဆရာ နူအူအာမင်ကို ဖမ်းဆီးနိုင်ခခြင်းပင် ဖြိုက်ပါရေ။ သူရေ ပါကစ္စတန်နိုင်ငံ ကရာချိမှာ ဟိရေ ဒါအူအူလုံး Dar-ul-Uloom လို့ ခေါ်ရေ မူဆလင်အစွန်းရောက် ဘာသာရေးကျောင်းနန့် အဆက်အသွယ်ဟိပြီးကေ အကြမ်းဖက်သင်တန်းတိ တက်ရောက်ဖို့နန့် အကြမ်းဖက်လုပ်ငန်းတိ လုပ်ကိုင်ဖို့အတွက် အရည်အချင်းရှိရေ ရိုဟင်ဂျာဘင်္ဂလီတိကို စုဆောင်းပီးနိန်ရေ လူတယောက်ဖြိုက်တေလို့ ဆိုပါရေ။
သူကို စစ်ဆေး မိန်းမြန်းစိုင်ကာလမှာ သူက ပါကစ္စတန်ထောက်လှမ်းရေး (ISI) နန့်ရာ မက ပါကစ္စတန်နိုင်ငံ ကရာချိမြို့အခြီစိုက် Maulana Aldus Qudus Burmi (chief of Huji- arakan) ဆိုရေ အကြမ်းဖက်အဖွဲ့နန့်ပါ အဆက်အသွယ်ဟိရေဆိုစော်ကို ဝန်ခံခပါရေ။ နောက် သူက ပါကစ္စတန်ထောက်လှမ်းရေးအဖွဲ့ရေ ရိုဟင်ဂျာဘင်္ဂလီအကြမ်းဖက် အဖွဲ့အစည်းတိအတွက် လက်နက် မှောင်ခိုလုပ်ငန်း၊ လက်နက်ခဲယမ်း ရှာဖွေစုဆောင်းပီးခြင်းလုပ်ငန်းတိကိုလည်း လုပ်ကိုင်ပီးနိန်ရေလို့ ထွက်ဆိုခပါရေ။
၂၀၁၂ ခုနှစ် အောက်တိုဘာလ (၈)ရက်နိန့် မှာ နူအူးအာမင်နန့် ဆက်စပ်ပြီးကေ သူ၏လုပ်ဖော်ကိုင်ဖက်ဖြိုက်တေ အလီအာမက် (ခ) အဘူဂျီဘရာကိုလည်း ဘင်္ဂလားဒေရှ့်အာဏာပိုင်တိက ဖမ်းဆီးနိုင်ခပါရေ။ သူကိုလည်း ဆက်လက်စစ်ဆေးမီးမြန်းရေခါ သူရေ အာဖဂန်နစ္စတန်နိုင်ငံမှာ စစ်သွီးကြွတစ်ယောက်အဖြိုက် တာဝန်ထမ်းဆောင်ခပြီးကေ ၁၉၈၅-၁၉၉၄ ခုနှစ်ကာလအတွင်း ပါကစ္စတန်နိုင်ငံ အနောက်ဖက် ဝါဇီရစ္စတန်ဒေသ မန်ရန်ရှာမြို့မှာ နိန်ထိုင်ခစိုင်က တာလီဘန်အကြမ်းဖက်သမားတိနန့် ဆက်စပ်မှုတိ ဟိခကြောင်း ကိုလည်း သူက ဝန်ခံခပါရေ။ Maulana Aldus Qudus Burmi (chief of Huji- arakan) လို့ ခေါ်ရေ အကြမ်းဖက်အဖွဲ့၏ တက်ကြွလှုပ်ရှားရေ အဖွဲ့ဝင်တယောက်ဖြိုက်တေ သူကို ပါကစ္စတန်အဖွဲ့အစည်းတိနန့် ဆိုင်ရေ စာရွက်စာတန်းတိ အပါအဝင် ဘင်္ဂလားဒေရှ့်ပါတ်စပို့နန့်တတူ ဖမ်းဆီးမိခြင်း ဖြိုက်ပါရေ။
အိန္ဒိယအစိုးရ အနိန်နန့် ရိုဟင်ဂျာဘင်္ဂလီရို့၏ အကြမ်းဖက် အန္တရာယ်ကို မြန်မာအစိုးရနန့် ဘင်္ဂလားဒေရှ့်အစိုးရတိကို သတင်းပီးခြင်း သတိပီးခြင်းတိ ပြုလုပ်နီစိုင်မှာပင် တဖက်မှာလည်း ပါကစ္စတန်ထောက်လှမ်းရေးအဖွဲ (ISI) နန့်တတူ တခြားအကြမ်းဖက်အဖွဲ့အစည်းတိဖြိုက်တေ Lashkar, Jasih Huji နန့် Tehrik – e –Azadi Arakan (TAA) စရေ အကြမ်းဖက် အဖွဲ့အစည်းတိရေ မတည်မငြိမ် ဖြိုက်နိန်ရေ ရခိုင်ဒေသကို ပစ်မှတ်ထား စိတ်ဝင်စားလာခြင်းအတွက် အထူးစိုးရိမ်မကင်း ဖြိုက်လျှက်ရှိရေ ဆိုစော်ကို တွိရပါရေ။ ယင်းပိုင် စိုးရိမ်ရရေ အဓိကအကြောင်းက ယင်းကြမ်းဖက်အဖွဲ့အစည်းတိက အစွန်းရောက်တိကို မွီးထုတ်ပနာ အိန္ဒိယ အရှေ့မြောက်ဒေသကို မတည်မငြိမ်မှုတိ ထပ်မံဖြိုက်ပွားလာနိန်ရေအတွက် ဖြိုက်ပါရေ။
နောက်ဆုံးအနိန်နန့် ဆောင်းပါးရှင်က အဂုအခါမှာ ပါကစ္စတန်အခြီစိုက် အစွန်းရောက်အဖွဲ့အစည်းတိရေ အစွမ်းရောက် အတွေးအခေါ်တိ လွှမ်းမိုးမှုတိ ကြီးထွားလာရေ ရိုဟင်ဂျာဘင်္ဂလီတိကို အကြမ်းဖက်ဖေါက်ခွဲရေးသင်တန်းနန့် ယင်းဖေါက်ခွဲရေးပစ္စည်းတိကို ကိုင်တွယ်၊ သုံးစွဲ၊ တပ်ဆင်ရေး နည်းပညာသင်တန်း ပို့ချမှုတိလည်း အယင်ကထက် ပိုမို များပြားလာရေဆိုရေအကြောင်းကို တင်ပြလိုက်ရပါရေ။
(The Hindustan Times သတင်းမှ ဆောင်းပါးရှင် Shishir Gupta ရီးသားထားရေဆောင်းပါးကို ကိုးကားပြီး ချင်းပျံ ရီးသားသည်)
No comments:
Post a Comment